កិច្ចសន្ទនាពហុភាគីស្តីពីខ្សែច្រវាក់ពាណិជ្ជកម្ម និងតម្លៃប្រកបដោយបរិយាបន្ន ក្នុងវិស័យចេក និងកៅស៊ូនៅកម្ពុជា

វេទិកានៃអង្គការមិនមែនរដ្ឋាភិបាល ស្តីពីកម្ពុជា (NGOF) សហការជាមួយអង្គការតម្លាភាពកម្ពុជា (TIC) ព័ន្ធសហជីពកម្មករកសិកម្មកម្ពុជា (CAWF) និងអង្គការ NatureLife Cambodia បានរួមគ្នារៀបចំកិច្ចសន្ទនាពហុភាគីស្តីពីខ្សែច្រវាក់ពាណិជ្ជកម្ម និងតម្លៃប្រកបដោយបរិយាបន្ន ក្នុងវិស័យចេក និងកៅស៊ូនៅកម្ពុជាដែលមានអ្នកចូលរួមមកពីតំណាងអជ្ញារធរខេត្តពាក់ព័ន្ធរួមមានដូចជា៖ មន្ទីរសង្គមកិច្ច មន្ទីរការងារ បេឡាជាតិសន្តិសុខសង្គម មន្ទីរកសិកម្ម មន្ទីរពាណិជ្ជកម្ម មន្ទីរសេដ្ឋកិច្ច និយោជក កម្មករនិយោជិត និងតំណាងសហជីពក្នុងវិស័យ កសិឧស្សាហកម្មដំណាំចេក និងកៅស៊ូ អង្គការសង្គមស៊ីវិល បណ្តាញសម្របសម្រួលនៃអង្គការមិនមែនរដ្ឋាភិបាលថ្នាក់ខេត្ត អង្គការសហគមន៍មូលដ្ឋាន (CBOs) ដែលសរុបមានចំនួន៤០នាក់។

គោលបំណងនៃកិច្ចសន្ទនានេះគឺដើម្បីបង្កើនការផ្សព្វផ្សាយអំពីតម្រូវការចាំបាច់ និងបញ្ហាប្រឈមរបស់កម្មករនិយោជិតនៅក្នុងវិស័យកសិឧស្សាហកម្មចម្ការចេក និងកៅស៊ូ ចំពោះសិទ្ធិជាមូលដ្ឋាន ការផ្តល់កិច្ចគាំពារសង្គម និងគោលការណ៍សុវត្ថិភាពនៅកន្លែងធ្វើការសម្រាប់ពួកគាត់ និងជំរុញឱ្យភាគីពាក់ព័ន្ធយកចិត្តទុកដាក់ចំពោះបញ្ហាប្រឈម និងតម្រូវការកិច្ចគាំពារសង្គម និងសម្ភារៈសុវត្ថិភាពអំឡុងពេលបំពេញការងាររបស់កម្មករនិយោជិតនៅក្នុងវិស័យចម្ការចេក និងកៅស៊ូ។ ផ្តល់ជាវេទិកាដល់កម្មករនិយោជិតនៅក្នុងវិស័យចម្ការចេក និងកៅស៊ូលើកឡើងនូវបញ្ហាប្រឈមរបស់ពួកគេដល់អ្នកធ្វើការសម្រេចចិត្ត រួមមាន មន្ទីរទទួលបន្ទុក និងភាគីនិយោជកដើម្បីចូលរួមផ្តល់នូវដំណោះស្រាយដល់កម្មករនិយោជិត។ ផ្តល់ឱកាសសម្រាប់កិច្ចពិភាក្សា និងកំណត់សកម្មភាពសម្រាប់ការអនុវត្តគណនេយ្យភាពគោលនយោបាយសារពើពន្ធ រួមមានពន្ធ និងការវិនិយោគប្រកបដោយការទទួលខុសត្រូវ ច្បាប់ខ្សែច្រវាក់ផ្គត់ផ្គង់ និងតម្លៃប្រកដោយបរិយាបន្ន ក្នុងឧស្សាហកម្មចេកលឿង និងកៅស៊ូ នៅកម្ពុជា និងដើម្បីផ្លាស់ប្តូរចំណេះដឹង បទពិសោធន៍ ការអនុវត្តល្អ ការសិក្សា និងកិច្ចសន្ទនាពហុភាគី ដើម្បីគាំទ្រ ខ្សែច្រវាក់ផ្គត់ផ្គង់ និងតម្លៃប្រកដោយបរិយាបន្ន ក្នុងឧស្សាហកម្មចេកលឿង និងកៅស៊ូ នៅកម្ពុជា។

កិច្ចសន្ទនានេះធ្វើឡើងនៅថ្ងៃទី១១ ខែតុលា ឆ្នាំ២០២៤ ក្រោមការគាំទ្រទាំងបច្ចេកទេស និងហិរញ្ញវត្ថុពីអង្គការអុកស្វាម (Oxfam) និង អង្គការដាយកូនៀ ពីរដ្ឋាភិបាលស៊ុយអែដ។